Porto conclúe 2011 cos mellores resultados da súa historia

Martes 10 de Xaneiro de 2012 12:11

Rexistrou un crecemento do 13,7 % no total de 2011 superando os 6M de pasaxeiros

O aeroporto de Porto terminou o ano 2011 batendo marcas. Ao peche do ano, pasaron polo aeroporto 6.004.589 pasaxeiros, concretamente 721.228 usuarios máis que no ano 2010, o que supón un crecemento en 2011 do 13,7%. Trátase, pois, do mellor resultado na historia do aeroporto.

O pasado mes de decembro as cifras foron moi próximas ás obtidas no mesmo período de 2010. No último mes de 2011 pasaron polo aeroporto 438.000 pasaxeiros contabilizándose 4.711 movementos. Hai que engadir que a oferta de destinos caeu un 2,8%, polo que se reforzan aínda máis os resultados alcanzados.

Ao longo de 2011, empezaron a funcionar 5 novas rutas: 3 operadas por Ryanair (Roma, A Rochelle e París Vatry), 1 operada pola TAAG (Luanda) e a ruta a Toronto operada por Air Transat. Actualmente, desde o aeroporto de Porto pódese viaxar a 60 destinos regulares directos a través de 13 compañías aéreas.

Durante o mes de decembro, as compañías aéreas que máis se destacaron foron Lufthansa ( 46,6%), seguida de Air Transat ( 37,8%) e Transavia ( 25,7%). Do mesmo xeito que noutras ocasións, París, con 80.142 usuarios, foi o destino elixido en decembro polos pasaxeiros de Porto, seguido nesta ocasión por Frankfurt, con 38.086, e Xenebra, con 35.276. .

No que respecta ao total do ano, Ryanair ( 35,1%), Air Transat ( 25,1 %) e EasyJet ( 14,2 %), foron as compañías aéreas que máis se destacaron.

O pasado 30 de decembro, o aeroporto do Porto celebrou a chegada do "Pasaxeiro 6 millóns", rexistrando un record máis na súa historia xa que por primeira vez alcanzábase a cifra de 6 millóns de usuarios nun ano. Teresa García, procedente de Madrid, foi a pasaxeira "6 millóns".